![](https://blogger.googleusercontent.com/img/b/R29vZ2xl/AVvXsEiu2DdDzuqNl-cJv2hCCJyaeXnWraCZC4LdyQAWzwV48p8lcEXWJF0dbFI-gxsiE7AWCUXmBtHrKkHP5FRRbYCDhhppq8OhQXF8iIPUHDtbJyFG9n5SsshHE2KluSZUKiquIna7DZDnuCuo/s320/121010A054.jpg)
Case nove de cada dez persoas se pronuncian nas enquisas a favor da axuda de cooperación ó desenvolvemento. Esta mañá en Portomarín, antes de saír cara Palas de Rei, o grupo da Coordinadora Galega de ONGs comprobou que entre peregrinos e veciños de Portomarín a porcentaxe tampouco baixa. “Qué puedo hacer? Dadme un número de cuenta”, pedía unha peregrina danesa minutos despois de que se instalara unha mesa informativa sobre a campaña Pobreza Cero na praza do Concello. Explicáronlle entón que na mesa só se recollían sinaturas para emprazar á Xunta de Galicia a destinar o 0,7 por cento de fondos a cooperación, que era só un acto informativo, así que, non moi convencida, conformouse con asinar e con asegurar maior participación futura na causa de Pobreza Cero.
![](https://blogger.googleusercontent.com/img/b/R29vZ2xl/AVvXsEjk-aHgbVon25Yu-ujVGNoJkyduTl6-AZVB1I81dwFkvW9uHM0xHYLftgFBWRbVTRe9aawKRuHmLbBiAdspRXF_8tPJKgkKkBu-pI8Fo33n5pM39HXD7uq-1w61z4uyZ8NsMDb_WqxBqKyr/s320/121010A120.jpg)
Ó pouco para outra peregrina e pregúntanos que canto é. Con tan boa disposición que ten, carteira en man e sacando xa algunhas monedas, é mágoa que non sexa unha alto cargo político. Só algún despistado que non se lembra do Dni queda sen asinar. Tampouco falta quen confunde a mesa informativa cunha mesa petitoria de fondos e trata de esquivar o encontro, pero o balance de só media mañá en Portomarín, no día despois do San Froilán, rúas medio desertas, sáldase cunha quincena de follas repletas de sinaturas. A mañá culmina cun acto institucional, onde a alcaldesa, acompañada por varios concelleiros da corporación, le un manifesto contra a pobreza. Logo comeza o camiño que nos levará esta tarde noite ata Palas de Rei, onde a Coordinadora Galega de ONGs aproveita o Camiño polo Pacto Galego contra a Pobreza para celebrar unha xunta directiva.
Texto: Gonzalo Brocos
Imaxe: Pedro Agrelo
No hay comentarios:
Publicar un comentario